TĀ SELWYN PARATA

Mauriora ki te rangi, kia Io Matua kore anake. 

Mauriora ki te whenua. 

Kia tātau ngā uri a rātau mā e hāpai nei i ngā tikanga, e tu pakari ai a Te Matatini. 

Tēnā tātau te hunga i whītiki, i maranga, kia toitū ai te Kapa Haka. Kei te mihi atu ki ngā Ariki, ki ngā rangatira, ki te iti, ki te rahi, ki te whakamataku. Tangihia o tātau mate huhua kua ngaro atu i te tirohanga kanohi, rārangi maunga ka tu tonu, rārangi tangata ka ngaro noa. Heoi ano ra ki te hunga mate whakangaro atu rā koutou ki te pūtahitanga o Rehua, ki te huinga o te kahurangi ka oti atu ai. 

“Ko te whare maire ka tu ki roto i te pā tūwatawata he tohu no te rangatira”. 

No reira kia tātau te iwi pūmau, pono, kaingākau hoki ki te kapa haka, ki ōna reo, ki ōna tikanga, ki kaha, kia manawanui, ko tātau “Ngā tatangi a te Whare Karioi” ngā kai manaaki, ngā kai hāpai a Te Matatini. 

Kei roto i ēnei tātai a Te Matatini ngā kaupapa hei ārahi i a tātau ki tētahi taumata ano. Ahakoa pēhea te huri a te ao. 

Ka mau tonu i te tūturutanga o tēnei puiaki te kapa haka, tōna orokohanga mai, ōna whakapapa mai i ngā kokoru i ngā pūmotomoto o te motu whakawhiti atu ki ngā Hawaiiki ō ō tātou matua tipuna. 

Ko tā Te Matatini e whai nei kei roto i tēnei mahere ko ngā kaupapa hei whakarangatira i te Kapa Haka. 

“Mā tini, mā mano, ka rangatira a Kapa Haka” 

Ko te mea nui takatu ake ai ki ngā mahi nei. 

Kia tau te ia o te mauri kia tātau katoa. 

Naku nā, 

Selwyn T Parata Heamana